नेपाली हास्यव्यङ्ग्य अनलाइन पत्रिका

डा. बमबहादुर थापा ‘जिताली’ :

यात्रामा गतिशील बन्न म सकूँ भेट्ने गरी आसन
भन्ने भाव, प्रभावमा महकिलो ठोक्ने गरूँ भाषण ।
नेपाली ममचा बनून् दिनदिनै चम्चा र काँटा बनून्‌
सारा सज्जन सेकुवासरि बनून् राम्रो मलाई भनून् ॥

जात्रामा चलखेल छन् तर सधैँ सत्ता घुमोस् फन्फनी
बन्ने लक्षण देखियोस् प्रगतिमा मेरो नयाँ जीवनी ।
नेपाली जनता भएर मुरली, गाना बजाना गरून्‌
साथी चञ्चल छन् भकुर्न भरिया आँखा चनाखा झरून् ॥

पार्टीका घटमा बलेर बिजुली सर्वोच्चता चर्कियोस्‌
साझा देश विशेषको रहरिलो सम्भावना घर्कियोस् ।
नोटैनोट लिएर यो बखतमा आफू बनूँ चर्चित
चोटैचोट दिएर मालिक बनूँ ! इच्छा भयो सिर्जित ॥

चाम्रो चाल चलोस् नयाँ चलनमा खाँडो जगाईकन
मालामाल हुने र राष्ट्र दुहुने आऊँन् सुनौला दिन ।
मेरो मात्र सदासदा रहरिलो वैकुण्ठ कुर्सी बनोस्‌
मेरो हैकमको प्रसिद्धि जनले देखेर आहा ! भनोस् ॥

मौलाएर दरिद्रता दिनदिनै जम्मै बनून् काँतर
भोगी दुर्दिन, राष्ट्रका जन सुकून् गर्दै रहून् आदर ।
भोका छन् दुनिया भनी अलिकता चिन्ता नहोस् बिल्कुल
नेपाली जनता परून् सकसमा आफ्‌नो बनोस् स्कुल ॥

नाताका घर छन् विशाल चुचुरा, साला र साली धनी
नातावाद विकासले गति लियोस् पार्टी फुटोस् तापनि ।
जागोस् तक्दिर शान्तिसाथ जिउने आफ्‌नो बनोस् नौ तला
आओस् अक्कल भ्रान्ति छर्न सकिने, ढाँट्ने र लुट्ने कला ॥

०००
नागार्जुन न.पा.–१, रानीवन, काठमाडौँ