नेपाली हास्यव्यङ्ग्य अनलाइन पत्रिका

लक्ष्मण नेवटिया :

हो म खोल्सा, सानै भए पनि,
मेरो आफ्नै छ गौरव, सम्मान।
खोलामा मिसिएपछि हराउँछ,
मेरो व्यक्तित्व-मेरो पहिचान।१।

ठूलो नाम पाएर के गर्नु ?
मलाई प्यारो छ स्वतन्त्रता,
खोलामा विलीन हुनु त,
अन्ततः हो नै परतन्त्रता।२।

मेरो आफ्नै हुन्छ चाल,
मेरो आफ्नै हुन्छ ताल।
सानो नै भए पनि के भयो,
मेरो आफ्नै हुन्छ छाल।३।

म बग्छु झारपातलाई ठेल्दै,
म बग्छु ढुंगासँग खेल्दै।
चलमलाउँछु, मुस्कुराउँछु,
माछासँग हेलिँदै, छेल्दै।४।

महानदी होस् वा खोला,
ठूलाले बोकाइ दिन्छ झोला।
सानै भएर बस्नुछ मलाई,
देखा जाला जस्तो जे होला।५।

म झरनामा गएर पोखिन्छु,
कहिले बगरमा नै रोकिन्छु।
जब अति दुख दिन्छ कसैले
तब जीवन्त भएर झोकिन्छु।

हो म खोल्सा, सानै भए पनि,
मेरो आफ्नै छ गौरव, सम्मान।
खोलामा मिसेपछि हराउँछ,
मेरो व्यक्तित्व—मेरो पहिचान।

०००
विराटगर