नेपाली हास्यव्यङ्ग्य अनलाइन पत्रिका

ब्युटिपार्लरमा जान्छिन् पार्वती दिनका दिन
सँगी साथी उनीभन्दा पछाडि पर्दथे किन ?
दोहोरी रेस्टुराँ पुग्छिन् सरस्वती सरासर
लक्ष्मीलाई छ क्यासीनो पानीधारा बराबर !

आजको युगमा उल्लु चढी उल्लु हुने किन
पाजेरो चढ्दछिन् लक्ष्मी दौडमा श्रेष्ठता लिन !
सरस्वती खुलेआम प्राडोमा सर्सराउँछिन्
खाजामा हाँसको मात्रै छोएला पो रुचाउँछिन् !

सवारी पार्वती निम्ति भने जस्तै भए पनि
भोजनमा भने जस्तो नहुँदा सोंच्दछिन् उनी
खान मिल्ने गरी जुर्रो कुन त्यो देशमा सरूँ
खान मिल्दैन साँढेको मासु यहाँ कसो गरूँ ?

सुसारे हिजोका साँढे, उल्लु, हाँस भए जति
सहेर के गरी बस्थे यस्तो कठोर ज्यादती
यो बेला हो यही जुक्ति चलेको राष्ट्रमा थियो
भोक हड्ताल नै गर्ने निधो बैठकले लियो !!

हाल : काठमाडौं