नेपाली हास्यव्यङ्ग्य अनलाइन पत्रिका

दिन दिनै जिन्दगीको पाना घट्दैछ
थाहै नपाई यौवनले मलाई छल्दैछ
आकाश चुम्यो महँगीले बाँच्न गाह्रो भो
‘सट’ भएको पैसा पनि तिर्न गाह्रो भो ।

उज्यालोको थोपा के हो थाहै भएन
दिनमा त जिन्दगीको सोचै आएन
हेर्दा राम्रो टाईसँगै बैंकको हाईफाई
कामको चाप कति लोड यो शरीरलाई ।

केश झर्यो, दिमागको क्षेत्र घट्दैछ
ओभरटाइम काउन्टरमा मार्केट बढ्दैछ
जागिरसँगै आफ्नो पनि दिन घट्दैछ
समय र पैसा लेनदेन दिन कट्दैछ ।

बाहिरबाट हेर्दा पैसा, पैसै झलमल्ल
भित्र पस्यो टेन्सनले मन अलमल्ल
दिन जति झ्वाम हुन्छ अफिसकै काम
घर पुग्दा सुतिसक्छन् माया भयो जाम ।

जता जाँदा पनि हुन्छ अफिसकै टेन्सन
आधा उमेर खर्चिसक्यो, तर छैन पेन्सन
साथी भाइ, आफन्तमा दूरी घट्दैछ
टिपटप जागिरसँगै जीवन चल्दैछ ।

के हो साथी दुई वर्षमा नभएको कुरा
हल्ला सुन्छु अब छिट्टै तलब बढ्दैछ
दिन दिनै जिन्दगीको पाना घट्दैछ
थाहै नपाई यौवनले मलाई छल्दैछ ।

काठमाडौं