नेपाली हास्यव्यङ्ग्य अनलाइन पत्रिका

१. मन्त्रीमा अपिल

मन्त्री हुँ भन्छौ अनि राजनेता
भोटै लुटेनी ठहर्यौ बिजेता ।
विकाश औद्धोगिक कृषि फाँट
सर्वत्रनै छ झुट–लुट–ढाँट ।।१।।

ठेक्का र पट्टा कमिसन् छ चर्को
पर्सेन्ट्को बोल कबोल अर्को ।
सामान किन्दा बिल बन्छ किर्ते
ब्यापारमा झन अतिनै कुकिर्ते ।।२।।

असक्षमै छौ, कि त भाग खान्छौ
गुन्डा र तस्करसँग मिल्न जान्छौ ।
लैजाउ सुशासनमा त देश ।
छोडेर फर्क कि त मन्त्री भेष ।।३।।

२. लामखुट्टे नेता

टिनिनिनिनिन्न बाजा बजाइ,
सधैं हामीमाथि गर्छ रजाइँ ।

चुटुक्क टोकि भुरुक्क उड्छ,
थाहा नपाए रगतमै बुड्छ ।

लामो छ खुट्टा लामै छ सुँड,
चिस्यान र फोहोरमा लाउँछ गुँड ।

लाम्खुट्टे नाम अँधेरीमा बस्ने,
नेताहरूले जस्तै दुनियामा डस्ने ।

नलाङ, धादिङ