नेपाली हास्यव्यङ्ग्य अनलाइन पत्रिका

आजभोलि
खै कुन्नी मन केले खाइ’राको छ
संविधान नलेख्ने पाजीहरूलाई
थचक्कै बस्ने गरी
दिउँ जस्तो भइ’राको छ
सहमति तोडने आचीहरूलाई
ढलमै खस्ने गरी
दिउँ जस्तो लाइ’राको छ ।

अरु भन्दा यहाँ
मान्छे सस्तो भइराको छ
छाडा संस्कृति
र साँढे प्रवृतिले
समाज खै कता गैरा’को छ
आजभोलि
खै किन
मनमा यस्तो आइ’राको छ
यी साँढेहरूलाई
दुई चार लात्ती
दिउँ जस्तो लाइरा’को छ
संविधानका भाँडेहरूलाई
दुई चार मुक्का
दिउँ जस्तो भइरा’को छ ।

गणतन्त्रका
नयाँ राजा बनेका काजीहरूलाई
दाम राखी ढोगुँ जस्तो लाइरा’को छ
यी जनता ठग्ने नाजीहरूलाई
गाममा लगी ठोकुँ जस्तो लाइरा’को छ
आजभोलि
खै कुन्नी मन के खाइरा’को छ
संविधान नलेख्ने
यी आलुपाँडेहरूलाई
जनताको रिस पोखूँ जस्तो लाइरा‘को छ ।

यिनकै लागि
जनताले रगतको खोलो बगाए
यिनकै लागि
जनताले भोको पेटमा चुह्लो लगाए
तर आज
जनताले खानु ठक्कर खाइरा’को छ
हिजो जस्तै आज पनि
सानो कामलाई सिंहदरमा
गेल चक्कर लाइरा’को छ
यस्तो देख्ता यो मनमा
यी ढाडेहरूलाई
दुई चार किक दिउँ जस्तो भइरा’को छ ।

सहिदको सपना मिच्दै
जनताको भावना किच्दै
नयाँ नयाँ हिटलर आइरा’को छ
किसानको ढाड टेक्दै
उद्यमीको दोलो सेक्दै
राहतको गीत गाइरा’को छ
आजभोलि
खै कुन्नी मन केले खाइरा’को छ
यी गाँडेहरूलाई
खै किन किन
दुई चार बक्सिड
दिउँ जस्तो भइरा’को छ ।

दाङ, हाल काठमाडौं