नेपाली हास्यव्यङ्ग्य अनलाइन पत्रिका

पुराना प्र.अ.को सरुवा भएर गएपछि केदारनाथ नयाँ प्र.अ.को रुपमा विद्यालयमा आए । शिक्षा कार्यालयमा आफन्त भएकाले उनलाई प्र.अ. बनेर आउन सजिलो भयो, जान्नेहरू यसै भन्थे । पढाईका सन्दर्भमा जे जस्तो भए पनि विद्यालयको सम्पतिको सुरक्षाका मामिलामा भने उनी गम्भीर थिए ।

जिल्ला शिक्षा कार्यालयमा आफ्नो मान्छे भएको काम लाग्यो, विद्यालयले शैक्षणिक सामग्रीको रुपमा एउटा कम्प्युटर पायो । विद्यालयमा सामान के आयो, उनलाई आपत थपियो । कम्प्युटरको सुरक्षालाई लिएर उनी चिन्तित रहन थाले । उनी आफ्ना सहकर्मी साथीहरूलाई पनि विश्वास गर्न सक्दैनथे । समस्या यति बिघ्न भारी भयो कि उनी बेला बेलामा टोलाउन र बर्बराउन थाले । राती निन्द्रा पर्न छाड्यो । अति भएपछि उनले मन मिल्ने साथीलाई आफ्नो समस्या सुनाए । अनि साथीकै सल्लाह अनुसार उनले कम्प्युटरलाई आफ्नो घरमै लगेर राख्ने निधो गरे ।

महिनौंदेखि विद्यालयको कम्प्युटर उनको घरमा छ । तर पनि विद्यालयको सम्पतिको सुरक्षा गर्न सकेकोमा उनी अहिले निश्चिन्त छन् ।
हेटौंडा ४, मकवानपुर