नेपाली हास्यव्यङ्ग्य अनलाइन पत्रिका

धारामा पानी धाउँदैन, तब न यो राजधानी !
चाहिँदा बत्ती आउँदैन, तब न यो राजधानी !

नामै क्याट, म्यान डू– म्याउँम्याउँ गर्छ मान्छे
चइनले बस्न पाउँदैन, तब न यो राजधानी !

जान्नुपर्छ अभावमा बाँच्न, पैसा हुँदैमा हुन्छ र !
डिपोमै इन्धन पाइँदैन, तब न यो राजधानी !

खोलानाला बदलिए, जताततै छन् ढलमती
नदीले पानी नै बगाउँदैन, तब न यो राजधानी !

सकेको फारू गर्नै पर्यो, भातपानी गर्नै पर्यो
जनता महिनौँ नुहाउँदैन, तब न यो राजधानी !

सरकार हो जिम्मेवार, घरै चलाई दिनुपर्छ
बजेटबिना झाडू लाइँदैन, तब न यो राजधानी !

चोर, फटाहा, घुस्याहाको पनि इज्जत छ यहाँ
अपराधी समेत डराउँदैन, तब न यो राजधानी !

सबै थाहा भए के मज्जा, रहस्यमा न छ मज्जा !
भोलि के हुन्छ थाहा हुँदैन, तब न यो राजधानी !
२०७१ माघ
काठमाडौँ