नेपाली हास्यव्यङ्ग्य अनलाइन पत्रिका

कस्ले कहाँ के पो गर्यो ? मेरो देशै हराएछ ।
लौन, साथी खोज्नु पर्यो ! मेरो देशै हराएछ ।।

सगरमाथा चिनो थियो डाँकाहरू आँखा गाड्थे ।
ऐले त्यो नै कता सर्यो ? मेरो दीशै हराएछ ।।

गौतम बुद्ध जन्मिएको लुम्बिनी थ्यो पहिचान ।
त्यस्तो गौरव किन टर्यो ? मेरो देशै हराएछ ।।

कस्तुरी र गैंडा हात्ती मल्लकालीन मूर्तिकला ।
त्यो सम्पत्ती कता तर्यो ? मेरो देशै हराएछ ।।

सयौं जाति भाषा धर्म, संस्कृति थे बिचित्रका ।
धर्म संस्कार कस्ले हर्यो ? मेरो देशै हराएछ ।

मेची–काली कर्णाली थे गण्डकी र कोशी सयौं ।
कस्ले लग्यो ? कता झर्यो ? मेरो देशै हराएछ ।

अमर सिंह, बलभद्र, भिमसेनको देशभक्ति ।
देशभक्ति किन मर्यो ? मेरो देशै हराएछ ।।

जनयुद्ध–जनान्दोलन किन भयो ? मर्म के थ्यो ?
संविधानमा गोरु चर्यो !! मेरो देशै हराएछ ।

विकास गर्ने युवा शक्ति विदेशमै पलायन ।
कस्ले यहाँ बुर्की छर्यो ? मेरो देशै हराएछ ।

भ्रष्टाचार चुलिएको सीमानामा चेपिएको ।
भनाउँदा नेता डर्यो !!! मेरो देशै हराएछ ।।
कस्ले लुट्यो ? कस्ले चोर्यो ? कस्ले मार्यो ? या त कतै ? ।
लौन, साथी खोजौं छिट्टो !!! मेरो देशै हराएछ ।।
नलाङ ७ बैरेनी, धादिङ
हाल अमेरिका, मेरिलेण्ड