नेपाली हास्यव्यङ्ग्य अनलाइन पत्रिका

पूर्वमा जन्मिएँ आफू पूर्वमै बन्द गर्दछु
जन्मथलो सधैँ बन्द गर्न आफू स्विकार्दछु ।
कर्मथलो बनेको छ पश्चिमी क्षेत्रमा म छु
यहाँको बन्दमा मेरो साथ हुन्छ स्विकार्दछु ।।

जातले घरको आफू बनेँ ब्राह्मण–क्षत्रिय
जातिको बन्दमा आफू हुन्छु नै बन्दमा प्रिय ।
ससुराली बने थारू उनको बन्दमा पुगूँ
इच्छा मेरो सबै बन्द राज्य आफ्नो कहाँ चिनूँ ।।

पार्टी सत्ता छ आफूमा बन्द रोक्न कसो गरूँ
बन्दको बन्दमा साथ कसरी पो पुरा गरूँ ।
नगरूँ बन्दको शक्ति नबुझ्ने मुर्ख बन्दछु
सम्धीको बन्दमा साथ नदिए दुःख भोग्दछु ।।

बाहिरी बन्दमा नित्य साथ आफ्नो बराबर
धर्मको नाममा बन्द हुन्छ नै धर्म हो घर ।
बिना कारणले बन्द गर्नु हुन्न म ठान्दछु
जन्म कर्म निजी जात धर्म आधार मान्दछु ।।

गुरु ईश्वरझैँ मेरा बन्द नै हुन् सुपूज्य छन्
जहाँ जहाँ हुने बन्द सबैमा साथ हुन्छ झन् ।
बन्दकै बलमा आफ्ना जाति धर्म कहाँ पुगे
क्षेत्रको प्रगति सारा बन्दले नै पुरा गरे ।।

पुर्खा नेपालका हाम्रा हत्या बन्द रुचाउँथे
अरूको दुःखमा आफू बन्द कारण पाउँथे ।
प्रगति विश्वको हेर्दै रोज्दछौँ बन्द सन्तति
हामी नेपालबासी हौँ बन्द जीवन पद्धति ।।
काठमाडौं