नेपाली हास्यव्यङ्ग्य अनलाइन पत्रिका

सबै तर्सिए देवता, भूमि,खोला
चिसो पश्चिमी वायु आएर होला ।
डराउन्न पन्छी सुसाएर सल्ला
सुतेको छ पोथी कराए नि चल्ला ।।

हुँ स्वाधीन भन्छौँ विदेशी छ खाना
विदेशी सुरा, वस्त्र, गाना, खजाना ।
बसेछन् विदेशी चलाएर गल्ला
सुतेको छ पोथी कराए नि चल्ला ।।

छिमेकी म चोखो भनेको भन्यै छ
र यो राज्य गाडी गनेको गन्यै छ ।
कतातर्फ भारी हुने हो नि पल्ला
सुतेको छ पोथी कराए नि चल्ला ।।

समस्या नपर्दा त कोही रुँदैन
भए स्वावलम्बी समस्या हुँदैन ।
छ न्यास्रो सबैमा हुँदा चाड खल्ला
सुतेको छ पोथी कराए नि चल्ला ।।

मिलेका फुटेछन्, फुटेका जुटेछन्
हिजोका सबैले सकेको लुटेछन् ।
विपक्षी कुरेको छ सरकार ढल्ला
सुतेको छ पोथी कराए नि चल्ला ।।

नगर्ने कुरा जे त्यही गर्न सर्छ
कहाँ युद्धले धर्म निर्वाह गर्छ ?
लुकी द्रोण मारे चलाएर हल्ला
सुतेको छ पोथी कराए नि चल्ला ।।

दुई पाखुरा छन् छ आदर्श बाँकी
छ बाँझो धरा यो र उत्साह बाँकी ।
छरौँ बीज खन्दै फुटाएर डल्ला
सुतेको छ पोथी कराए नि चल्ला ।।

सुर्खेत

स्पष्टीकरण
०चिल– छिमेकी ।
०पोथी– राज्यसत्ता ।
०चल्ला– आफू (देश) खतरामा भएको महसुस गरी पोथी जगाउन हल्ला गर्ने तपाईं हामी ।