नेपाली हास्यव्यङ्ग्य अनलाइन पत्रिका

लाग्थ्यो मूर्तिमा
शान्त
प्रतिबिम्बित छ ,
देख्ने बितिक्कै हृदयबाट
गुञ्जिरहन्थ्यो
ऊँ मणि पद्मे हुँ ।
लागिरहेछ आज
मूर्तिको हत्या भै
छायाँ कतै बिलाएको छ
गुञ्जिरहने मन्त्र सबै
रोडन भै
आँसुसँगै बगिरहेको छ ।
हो उनिहरू
गुम्बा बनाउनुको सट्टा
देश
मैदान बनाउन चाहन्छन् ।
शान्तिको बिकल्पमा
शकुनी जन्माउन चाहन्छन् ।
मैले आज आफुलाई
भिष्म हुँदै गइरहेको देखिरहेको छु ।
आँखाका सबै चाहना
पाण्डव भएर चोइटिरहेको देखिरहेको छु ।
भन ! यति बेला मैले कसरी जपुँ ?
ऊँ मणी पद्मे हुँ
चारै तिर छ कौरवका छायाँहरू
सबै शकुनी कै जाल भएर ललकारिरहेछ ।
हो बुद्ध स्मृतिमा बग्ने पल
बारुद भएको देख्दैछु ।
बुद्ध तृष्णामा चल्ने मस्तिष्क
क्षेपाश्त्र भएको देख्दैछु ।
लाग्छ यहाँ बुद्ध जन्माउन फेरि
समयले कठोर संघर्ष गर्नु पर्नेछ
मात्र अनि
शान्ति क्षेत्र नेपाल जन्मने छ ।
विश्व अनुयायी भै
ब्रम्हाण्ड नै गुञ्जाइरहने छ ।
ऊँ मणि पद्मे हुँ ।
ऊँ मणी पद्मे हुँ ।

काठमाडौं