नेपाली हास्यव्यङ्ग्य अनलाइन पत्रिका

प्रदीप रत्न शाक्य :

नयाँ सडक
आज पनि शहीदकै
आलो रगत बन्दै
मेरो सपनामा आउँछ
भनिरहन्छ
जुद्ध शमशेरहरू जीवित छन् ।

छाती फुकाएर
आजादी खोजिरहेका साहसहरू
सपना दोहोर्‍याउँदै
उत्पीडन गुञ्जाइरहेका कल्पनाहरू
चिच्याउँदै भन्छन्
देश अझै बन्धकमा छ ।

म नयाँ सडकलाई हेर्छु
उभिरहेको त्यो जुद्ध शमशेरलाई हेर्छु
भूगोल पार्कको
पृथ्वीले सुनोस् भनी भन्छु
म ती रगतहरूको
प्रतिनिधित्व गर्न आइरहेको छु
खबरदार !
शहीद जीवित छन् ।

पीपल बोट हाँस्छ र भन्छ
बहुलाउँदै
शहीद विस्थापित इतिहास हुन्
नयाँ सडक भत्किँदै गरेको प्रकृतिमा छन्
हा हा हा हा …. हा हा हा हा
म ब्युँझन्छु अपाङ्गको प्रकृतिमा ।

फुटपाथ रुँदै मलाई भन्छ
बिहानी तेरो
एका देशको कथा भइसकेको छ ।

लाग्यो
नयाँ सडक
न्यूरोडमा परिवर्तित भई
आदीवासी
मुर्दावाद भन्दै चिच्याइरहेको छ ।

०००
काठमाडौं