नेपाली हास्यव्यङ्ग्य अनलाइन पत्रिका

आयो प्रजातन्त्र भनेर सुन्दछु,जाला प्रजातन्त्र भनेर सुन्दछु
के हो प्रजातन्त्र कहाँ उदाउँछ, कता पसी जान्छ कहाँ बिलाउँछ ।

आफ्नै कुरा मात्र सधैं फलाकनु,कुरै अरूका नसुनेर काटनु
ढुंगा छ ऐना घरका फुटाउनु,यै हो प्रजातन्त्र भने म के भनुँ।

सिन्को नभाँची अलमस्त हल्लिनु,खेतै नरोपी खलिहान खोजनु
कालू कमा भालु उडा गराउनु,यै हो प्रजातन्त्र भने म के भनुँ ।

चन्दा बटुल्ने चमचा जुटाउनु,पार्टीपिछे एक रसीद काटनु
जो दिन्न उस्को तबला बजाउनु,यै हो प्रजातन्त्र भने म के भनुँ ।

पढाइभन्दा पनि टाइ लाउनु,दुई तियाँ के कहिल्यै नआउनु
मैह्नै पिछे शुल्क भने बढाउनु,यै हो प्रजातन्त्र भने म के भनुँ ।

चुनावका लागि कलेज धाउनु,लाटा र सोझा झगडा गराउनु
जाँचै नदी पास हुँ भन्न आउनु,यै हो प्रजातन्त्र भने म के भनुँ ।

अनर्थले अर्थ निकै कमाउनु,नाता कुटुम्बीसित धाक लाउनु
बिहे सरी जन्मदिनै मनाउनु,यै हो प्रजातन्त्र भने म के भनुँ ।

संस्थानमा दुर्गतिले धसाउनु,नौ मासको बोनस खान पाउनु
पुगेन भन्दै जनता चुसाउनु,यै हो प्रजातन्त्र भने म के भनुँ ।

झन् पातलो झन् महँगो बनाउनु,अजीर्णले छुन्न भनी फकाउनु
सम्साँझमा नै बिजुली निभाउनु,यै हो प्रजातन्त्र भने म के भनुँ ।

कमलपोखरी, काठमाडौं