नेपाली हास्यव्यङ्ग्य अनलाइन पत्रिका

लगातार तीन दिन अबेला घर आयो रेशम । यस्तो मान्छे होइन । ठीक पाँच बजे जहिले पनि हाजिर हुने गर्थ्यो । राधाको चित्त बुझेको छैन । भन्न पनि सक्दिनन् । ‘राधा, यो रेशम हेर्दा निकै भलाद्मी जस्तो छ । तर यसको भर नगर्नू । यिनीहरूको तीन पुस्ताको रेकर्ड अलि बेग्लै छ । सबै कन्या राशी ।’ सहेली गोमाको सूचना, बिहे गरेकै साल । राधाले सोचिन्– यिनलाई म होटल जाने मौकै दिन्न । आफ्नै भान्सामा तृप्त बनाउँछु । हुन पनि त्यस्तै भयो । सोह्र वर्षसम्म कुनै शिकायत गर्नुपरेन । राधा पनि कुनै परीभन्दा कम होइनन् । अहिले घरमा दुई जना मात्रै । जुम्ल्याहा छोराछोरी बोडर्स । अनुसन्धान गरिन् राधाले । तीन दिन तीन पुतलीसित घुम्न गएको कुरा थाहा भयो ।
एक दिन समयमै घर आयो रेशम । ढोका बन्द । मोबाइल पनि निस्क्रिय । झमक्क साँझ परेपछि आइन् राधा । एक छिन बोलेनन् । सहन गाह्रो भएपछि रेशमले नै कनिकाको पोको खोल्यो । ‘पतिदेव, हजुर तीन पुतलीसित तीन दिन घुम्नु भो । तेत्तीस प्रतिसत महिलाको पनि हक हुन्छ । म पनि आज एउटा भमरसित झोला सिनेमा हेर्न गएँ, कुनै आपत्ति ?’ रेशमको अनुहार हेर्नलायक थियो । समाजशास्त्रमा स्नातकोत्तर गरेकी राधा जागिर खान सक्थिन् । तर रेशमकै अनुरोधमा घरमै सीमित भएकी थिइन् । स्वतन्त्र लेखक बनिन् । राधासित बहस गर्ने योग्यता ऊसित थिएन । बोल्यो– ‘राधा, अब आइन्दा म पनि समयमा घर आउँछु ।’ एउटा विजयी मुस्कानको रेखा राधाको अनुहारमा कोरियो । वास्तवमा उनी गोमाको घरमा दिन बिताएर आएकी थिइन् ।

चितवन