नेपाली हास्यव्यङ्ग्य अनलाइन पत्रिका

बन्द सफल भएकै हो कमरेड !
बन्द सफल भएकै हो,

ज्ञानेको घरमा आज चुल्हो जलेन
बडो, ठेलागाडा चलाएर
छोराछोरीलाई बोर्डिङ स्कुलमा पढाउँथ्यो
दिनभरि उत्तानो टाङ् लगाएर
घरै बसेछ ज्ञाने
ठेला चलाउन नपाएपछि
न नुन, न भुटुन,
मसाग ज्ञाने
छोराछोरीलाई खुबै ठुलो मान्छे बनाउँछु भन्थ्यो
आफू नखाए पनि छोराछोरीलाई भोकै राख्दिन भन्थ्यो
बल्ल ठिक पर्यो कमरेड
बन्द सफल भएकै हो कमरेड !
बन्द सफल भएकै हो ।

बाटोमा सुत्केरीको बेहाल भएको छ
न ठेला भेटिएको छ
न कुनै रिक्सँग नै
एम्बुलेन्सले दोब्बर भाडा मागेछ
ट्याक्सीले त झन चौबर
सुत्केरीले
बाटोमै बच्चा जन्माउली जस्तो छ कमरेड !
उता अस्पतालले बिरामी डिस्चार्ज गरेछ
उसको पनि उस्तै हाल छ
अस्पताल छोडे, होटल बन्द छ
बाटोको बास हुने भएछ कमरेड !
यस्तो आपत परेपछि
बन्द सफल भएकै हो कमरेड !
बन्द सफल भएकै हो ।

चौतारा–चौतारामा तास खेल्नेको भीड देख्दैछु
आज सबै फुर्सदिला भएका छन्
सबैले धन्यबाद दिएकै छन्
कार्यालय धाउनुपर्ने पनि यतै छन् आज
अधिकाँश उद्योग पनि बन्दै छ
करोड त नाघ्छ कमरेड !
आजको व्यापार घाटा
करोड त नाघ्छ,
उत्पादन नभए पनि
उद्योग नै नचले पनि
हाम्रा मजदुरहरूको एकता देखिएकै छ
सबैले पारिश्रमिक पाएकै छन्
राजस्व छल्ने व्यापारीको
घाटा भएर के भो र !
हाम्रा कमरेड मजदुरहरूले त आराम गरेकै छन्
त्यसैले
बन्द सफल भएकै हो कमरेड !
बन्द सफल भएकै हो ।

धीरज आज निकै थकित देखिन्छ
खुट्टैभरि फोकै फोका उठेछ विचराको !
तीन घण्टाको हिँडाइमा परेछ
नहिँडे परीक्षा छुट्ने
परीक्षा छुटे वर्षभरिको मेहनत खेर जाने
के गरोस् विचरा !
कुनै स्कुलका सवारी सँगधन
चल्न नदिएको ठीक भएछ कमरेड !
सँगरा विद्यार्थीले दुःख पाएपछि
बन्द सफल भएकै हो कमरेड !
बन्द सफल भएकै हो ।

घर आउँदा पो थाहा भो कमरेड !
अघि बिहानै फुटाएर जलाएको एम्बुलेन्समा
एउटी बुढी आइमाई थला परेर अस्पताल जाँदै रै‘छिन्
हाम्रा ‘अस्थायी कार्यकर्ता’हरूले फुटाईहाले
र
क्षणभरमै आगो पनि लगाई हाले
ती बुढी आइमाई ठाउँको ठाउँ नै मरेको खबरले
आजको दिनभरिको बन्द सफल भएकै हो ।

घर आउँदा पो थाहा भो कमरेड !
ती बुढी आईमाई त
मेरी आमा पो रहिछन्
म घाट जानु पर्ने भयो कमरेड !
अब कसरी भनुँ !
बन्द सफल भएकै हो कमरेड !

काठमाडौं