नेपाली हास्यव्यङ्ग्य अनलाइन पत्रिका

रसरङ्ग- १ ड्राईभरको बानी

हाकिमसाब छउन्जेल कार्यालयका ड्राईभरले मलाई एकदिन तपाईलाई मेरो तर्फबाट खाजा ख्याउँछु हाकिमसाब जाउँ कि जाउँ भनेर लिँडेढिपी कस्न थाले । हुन्छ त भनेर उनको साथ लागेर एउटा होटेलमा गयौँ । खाजा मगाए र साथमा राष्ट्रिय झोल पनि । खाजा खाँदै राष्ट्रिय झोल तन्काउँदै थियौं । झोलभित्र छिरेको एकछिनपछि त ड्राईभरले दुइटै हात माथि उठाएर ठूलो ठूलो स्वरमा दोहोर्‍याएर तेहेर्‍याएर हाँस्दै भने- हाकिमसाब छउन्जेल मलाई के को पीर ! उनी भन्दै थिए- मैले त ठट्टा गर्‍या है हाकिमसाब ! नमीठो नमान्नु होला ।
ठट्टाको भाषा बोलेर लट्टा पार्ने त उनको पुरानो बानी पो रहेछ ।

रसरङ्ग- २ आगन्तुक रजिष्टर

केही समयअघि टेलिकम कपनको कार्यालय प्रमुख भएर उनी त्यहाँ आइन् । एकदिन उनले मलाई फोन गर्दै भरे चाँडै लिन आउनु है भनिन् । कार्यालय समयमै लिन गएँ । टेलिकमभित्र छिरेपछि महिला गार्डले आगन्तुक रजिष्टरमा नाम, ठेगाना, मोबाइल नं. लेख्न भने । मेरो पालो ठट्टा गर्दै कार्यालय प्रमुखको नाम, ठेगानामा सरस्वतीनगर लेखेँ । उनले हेरिरहेकी रहिछन् र मलाई भनिन्- तपाईं केटा मान्छे भएर केटी मान्छेको नाम लेख्ने, आफ्नै नाम लेख्नुस् ! मैले भने- तपाईंकै कार्यालय प्रमुखको नाम लेख्या त हो नि ! अहँ हुँदैन भन्दै थिइन् । त्यहीबेला कार्यालय प्रमुख आएर जाउँ जाउँ भन्दै मलाई लिएर हिडिन् । महिला गार्ड भने ट्वाँ परेर हामीलाई हेर्दै थिइन् ।

रसरङ्ग- ३ उपहार

माओवादी निकट महासंघका अध्यक्षलाई भेट्न गएँ म । मैले लेखेका कृति विक्रीबाट जे जति पैसा पाउँछु त्यो पैसा सबै मिर्गौला पीडित र अनाथ बालबालिकाहरूलाई सहयोग गर्दैछु, त्यसका लागि यहाँबाट केही सहयोग मिल्थ्यो कि भनेर आएको सर भनेँ । मेरो कुरा सुनेपछि उहाँले कृति हेरौँ भन्नुभयो । मैले दिएँ । उहाँले सरसर्ती हेर्नुभयो र भन्नुभयो- तपाईंले मेरो नाम लेखेर उपहार भनेर लेख्नुस्, सही गर्नुस्, आजको मिति लेख्नुस्, अनि मलाई हस्तान्तरण गर्नुस् । उहाँले जे जे भन्नुभयो मान्दै गएँ । कृति धेरै किनिदिने भए भनेर म मनमनै दङ्ग परँे । सहयोग त जुटेन । उहाँको कृति उपहार लिने तरीका देखेर मलाई औधी हाँसो लाग्यो ।

०००
चाबहिल, सरस्वतीनगर