नेपाली हास्यव्यङ्ग्य अनलाइन पत्रिका

अमर अधिकारी :

१.
श्रीमान-श्रीमती बजार गएछन्।
श्रीमतीः साहुजी ! तितेकरेला र चिप्लेभिण्डी किलोको कति कति पर्छ ?
साहुः असी असी
श्रीमान्ः टर्रो अमलाको भाउ के हो नि ?
श्रीमतीः अमला मात्रै भने भैगो नि ! किन टर्रो जोड्नुपर्यो ?
श्रीमान्ः तिमीले तीते र चिप्ले भन्न हुने, मैले टर्रो भन्न नहुने ?

00

२.
छिमेकीः कतातिर हो सदस्यज्यू हतारिँदै ?
वडा सदस्यः वडा कार्यालयमा बैठक बस्दैछ रे, त्यतै जाँदैछु ।
छिमेकीः ए ! भनेपछि बैठक अहिलेसम्म उठिराख्यारहेछ !

00

३.
बलवीरः कसले भन्छ गाउँमा विकास भाछैन भनेर ?
वीरबलः के छ र त्यस्तो देखिनेखालको विकास ?
बलवीरः देखेनौ, बाटोको दायाँ-बायाँ, खेत-बारी सबै ठाउँ सूर्ती र गुट्खाको खोस्टाले ढाकेको ? त्यो पनि त विकासै हो।

00

४.
(श्रीमान् साग किनेर ल्याई भान्सामा बसेर केलाउँदै)
श्रीमतीः हिजो त साग केलाउँदा पात पात मात्रै छुट्याउनुभाथ्यो, आज डाँठ समेत पकाउने गरि छुट्यानुभा छ त ?
श्रीमान्ः हिजो मुठाको पच्चीस रुप्पेमा पाएको थिएँ, आज बढेर दोब्बर भएछ, त्यै भएर पैसा परेको डाँठ किन खेर फाल्नु ?

00

५.
आमाः किन हो छोरी हस्याङफस्याङ गर्दै कोठा सफा गर्न लागेको ?
छोरीः सासू आउनुअघि कोठा सफा गर्नुपर्यो भनेर नि आमा !
आमाः बिहे नभएकी छोरीको को परेछ सासू ?
छोरीः साबित्रा र सुशिला। ती दुबै मेरा साथी हुन् क्या आमा ! हतार भएकाले साबित्रालाई सा. र सुशीलालाई सु. भनेकी हुँ क्या …. ।

०००
बुढानिलकण्ठ, काठमाडौँ