रमेश समर्थनआमाको अल्छी सपना
“के अब त्यो बसिरहने हो त आमा !” “मैले अल्छी सपना देखेकी रहेछु बाबु ! म सारा सृजनशक्तिको शपथ लिएर भन्न सक्छु तर त्यो यो रूपमा आउला भन्ने मेरो सपनाको छेउमा पनि थिएन ।”
रमेश समर्थन :
(कवि गोपालप्रसाद रिमालको प्रख्यात कविता ‘आमाको सपना’ को एक अंशमाथि प्यारोडी)
“आमा ! त्यो आयो र !”
“हो बा, त्यो आयो;
तर त्यो यसरी नै आउँछ भन्ने मेरो सपनामा थिएन
त्यो आउन त आयो
तर न तिम्रा लागि आयो
न मेरा लागि आयो ।
त्यो आउँदा त एक उत्साह लिएर आएको थियो
त्यो आउँदा सारा जगत् सगबगाएको थियो
तर त्यो त ग्रहणोदयको सूर्य बनेर आयो
उज्यालो लिएर आउनुपर्ने
दिउँसै अँध्यारो लिएर आयो ।
कतै करोड लिएर आयो
कतै रोड लिएर आयो
कतै अरब लिएर आयो
कतै खरब लिएर आयो
कतै महल लिएर आयो
कतै हलाहल लिएर आयो ।
त्यो आएपछि त मेरा छोरा,
तिमी रोगले जीणर् बन्यौ
म तिम्रो पीडामा रुँदै छु ।”
“के अब त्यो बसिरहने हो त आमा !”
“मैले अल्छी सपना देखेकी रहेछु बाबु !
म सारा सृजनशक्तिको शपथ लिएर भन्न सक्छु
तर त्यो यो रूपमा आउला भन्ने
मेरो सपनाको छेउमा पनि थिएन ।”
०००
रुपन्देही
