नेपाली हास्यव्यङ्ग्य अनलाइन पत्रिका

सेतै फुलिस् कपाल रङ्गाऊ बुढा भन्छिन् मेरी बुढी
ब्यायाम बढाऊ अब पेट घटाऊ बुढा भन्छिन् मेरी बुढी

स्वादे जिब्रो मेरो मिठो खान मन लाग्छ आफूलाई
तौल बढ्ला फेरि धेरै नखाऊ बुढा भन्छिन् मेरी बुढी

हो लड्खडाउँछन् यी मेरा पाइलाहरू कहिलेकाहीँ
सँगैँ हिँड्दा आऊ हात समाऊ बुढा भन्छिन् मेरी बुढी

आदत न हो टुच्च लाउन मन लाग्छ साँझ परेपछि
घरमै पिऊ तर भट्टितिर नजाऊ बुढा भन्छिन् मेरी बुढी

फेसबुक र टिकटकमा मायालुका तस्बिर हेरेपछि
घरीघरी माया पनि देखाऊ बुढा भन्छिन् मेरी बुढी

जीवनभर साथ दिन्छु भनेकै थिएँ फेरो लाउँदा खेरि
मायापिर्ती हाम्रो अमर बनाऊ बुढा भन्छिन् मेरी बुढी ।

०००
फ्लोरिडा, यूएसए