दीपक गौतमआधा दर्जन ठोक्तक
झिँगाले झैँ मनपेट खोल्छन् हाम्रा बुद्धिजीवीहरू नेतृत्वको आलोचना गर्छन् चोक चौतारामा आखिर तिनकै पाउ मोल्छन् हाम्रा बुद्धिजीवीहरू ।
दीपक गौतम :
१.
दुष्टहरू जुटिरा’छन्, हेर्नेहरू हेरिरा’छन्
निर्धालाई नै कुटिरा’छन्, हेर्नेहरू हेरिरा’छन्
तैं चुप मै चुप छ समाज, बोल्ने आवाज मत्थर
छ लुट्नेहरू लुटिरा’छन्, हेर्नेहरू हेरिरा’छन् ।
२.
भोकै बस्छन् हाड-मासुका आगो जोर्नेहरू
नाङ्गै बस्छन् अजङ्गका पहाड फोर्नेहरू
अरबौंका भ्रष्टहरू सानले बाँचिरहँदा
सुली चढ्छन् आज यहाँ चप्पल चोर्नेहरू ।
३.
शिक्षानीति बनाउँछन् ती व्यापारीहरू
महिलानीति बनाउँछन् बलात्कारीहरू
नारामात्रै बन्छ देशमा केवल सुशासनको
जहिलेसम्म सत्ता हाँक्छन् भ्रष्टाचारीहरू ।
४.
हरेक मान्छे दुनियाँलाई प्रेरक बन्न सके
जिन्दगीको उकालीमा अथक् बन्न सके
पहिचान उसको बल्ल अलग हुन सक्छ
सङ्घर्षले जीवनगाथा रोचक बन्न सके ।
५.
बहसमा त कडा बोल्छन् हाम्रा बुद्धिजीवीहरू
झिँगाले झैँ मनपेट खोल्छन् हाम्रा बुद्धिजीवीहरू
नेतृत्वको आलोचना गर्छन् चोक चौतारामा
आखिर तिनकै पाउ मोल्छन् हाम्रा बुद्धिजीवीहरू ।
६.
निर्वाक् ती ओठहरूलाई बोल्न सिकाउनु छ
मनका सारा पीडा-व्यथा खोल्न सिकाउनु छ
प्रपञ्च ती जति हुन्छन् निमुखाका विरुद्धमा
एक-एक गर्दै पालैपालो बिथोल्न सिकाउनु छ ।
०००
हेटौडा
‘विसङ्गत वर्तमान’ (२०७७)
Subscribe
Login
0 Comments
Oldest
