नेपाली हास्यव्यङ्ग्य अनलाइन पत्रिका

दीपक गौतम :

१.
हिमाल सोध्छ- मेरो उचाइ कसले ढलाउँदै छ ?
पहाड सोध्छ- मेरो पाखो कसले जलाउँदै छ ?
अपमानको घुट्का मैलाई किन ? सोध्छ तराई
भन सरकार यो देश मेरो कसले चलाउँदै छ ?

२.
लिपुलेक कसको भन ? कालापानी कसको ?
वैरीसँग लड्ने प्यारो नालापानी कसको ?
छिमेकीले जङ्गेपिल्लर वारि सारिसक्दा
हिसाब गर्दै बस्छ सरकार लाभहानि कसको ?

३.
हिजोआज मान्छे किन यति भ्रष्ट छ ?
मान्छेबाटै मान्छे किन यति त्रस्त छ ?
समयले अन्तरिक्ष उडान भरिसक्यो
हाम्रो समाज अझै पनि रूढिग्रस्त छ ।

४.
कतिपय नाङ्गिनुमा जीवन देख्छन् आजभोलि
कतिपय बाङ्गिनुमा जीवन देख्छन् आजभोलि
किन यतिबिघ्न स्वार्थी भएका हुन् मान्छेहरू
आफैंमात्र झाङ्गिनुमा जीवन देख्छन् आजभोलि ।

०००
हेटौँडा