नेपाली हास्यव्यङ्ग्य अनलाइन पत्रिका

दीपक गौतम :

(१)
खोलामा गई माछा खोज्छ कस्तो मूर्ख मान्छे होला ?
जङ्गलमा गई चरा खोज्छ कस्तो मूर्ख मान्छे होला ?
सायद यस्तो भन्ने दिन पनि अब टाढा छैन
गर्भमा जीवित बच्चा खोज्छ कस्तो मूर्ख मान्छे होला ?

(२)
यसरी कमाएको छ त्यसरी कमाएको छ
मान्छेले सम्पत्ति जसरी कमाएको छ ?
महलको उचाइमात्र नाप्ने यो समाजले
खोज्दैन किन कसरी कमाएको छ ?

(३)
सकेसम्म लुटौँ आज भोलि देखाजाला
महाभोजमा जुटौँ आज भोलि देखाजाला
यसो भन्छन् डाडुपन्युँ बोकी भण्डार छिर्नेहरू
सिध्याएरै छुटौँ आज भोलि देखाजाला ।

(४)
बोकी हिँड्ने नाम्लोडोको कहिलेसम्म बा ?
सधैँ हाम्रै भुँडी भोको कहिलेसम्म बा ?
भोलिभोलि भन्दाभन्दै जुनी बित्नै लाग्यो
हेरीबस्नु आमा रोको कहिलेसम्म बा ?

(५)
सोझा जनता झुक्याउने मालिकको देश नबनोस् यो
मुखमा बुझो लगाइएका बालिगको देश नबनोस् यो
जोसुकैले नाङ्गो नाच नाच्दा आँखै सामुन्नेमा
टुलुटुलु हेर्दै बस्ने सालिकको देश नबनोस् यो ।

०००
हेटौडा