नेपाली हास्यव्यङ्ग्य अनलाइन पत्रिका

बाबुराम पोखरेल :

१
पैले पैले खलाँसीले दाइ भन्यो, अलि पर सरिदिएँ
अलिपछि काका भन्यो, सहेँ, चुपै लागि झरिदिएँ
हिजो मात्र के देखेछ ? बस्नुस् हजुरबुवा भन्यो
रिसको पारो यत्ति चढ्यो, झन्नै दारा छरिदिएँ ।

२.
दर्शकहरुको लर्को वारि अनि पारि रहेछ
सृङ्गारमा सजिएकी परीको सवारी रहेछ
सारा दर्शकहरु ढल्दा एउटा जवानलाई केही भएन
आखिर हेर्नुस्, ऊ त सच्चा ब्रह्मचारी रहेछ ।

३
नाकमा के झिँगो बसेथ्यो, हतारिएर गइछ
मलाई चाहिँ यता असैह्य पीडा दिएर गइछ
प्रेमपूर्वक उसलाई मैले मुटुमा राखेको थिएँ
आफू बसेकै ठाउँसँगै उसले लिएर गइछ ।

४
मलाई पनि मेरै देशको मन्त्री बन्न मन छ
सुइयँ जाने फराकिलो बाटो खन्न मन छ
देशमा बसी विदेशीको कुरा मान्नेहरूको त
एक एक गरी छामी छामी करङ गन्न मन छ ।

०००
विराटनगर