नेपाली हास्यव्यङ्ग्य अनलाइन पत्रिका

विनोद खनाल :

एक
वैंशमा त म पनि चैँ झिल्के कान्छो भको थिएँ,
तिम्रै निम्ति भनी मैले कानमा कुण्डल लाको थिएँ,
फकाउन तिम्लाई मैले गाएँ एउटा पप गीत,
माया मात्र गर्‍यौ मलाई हिडिदियौ अर्कैसित ॥

दुई
तिम्रो मात्र भजन किर्तन कतिदिन गाउनु मैले,
तिम्रो घरमा जाने बाटो कतिदिन धाउनु मैले !
मुस्कुराउँछ्यौ मात्र कैल्यै कर्के नजर कर्क्याउन्नौ,
प्रस्ताव राख्दा चुप लाग्छ्यौ जवाफ कैल्यै फर्काउन्नौ ॥

तीन
देश विकास गर्ने नेता भत्तामा नै अल्झिराछन् ,
बिराला र कुकुर जस्ता सत्तामा नै बल्झिराछन्,
भ्रष्टाचार र मंहगीले जनतालाई पिरिराछन्,
सिंहदरबारभित्र स्याल मात्र छिरिराछन् ॥

०००
धुलाबारी, झापा।