नेपाली हास्यव्यङ्ग्य अनलाइन पत्रिका

तेजविलास अधिकारी :

१.
धर्ती आफ्नै भए पो जाँगर लाग्छ
अर्ती उपयोगी भए पो जाँगर लाग्छ
अर्काका भूमिमा गएर श्रम गर्नुपर्नेलाई
साँच्चै भनौँ देशको माया केको लाग्छ ?

२.
म गर्छु भन्छ सत्तामै पुग्छ
सोचेको छु भन्छ सत्तामै पुग्छ
पुग्छ पटक पटक ऊ सत्तामा
पुगेको भोलिपल्ट जनतालाई थुक्छ ।

३.
बाटो नबनाउन राजनीति गरे
माटो बेच्न राजनीति गरे
के के गरेनन् यहाँ नेता भन्नेले
काम नगरी खान राजनीति गरे ।

३.
उस्तै छौँ हामी नेता सुध्रिँदैन
पिर र चिन्ताको झरी उत्रिँदैन
आशा मरेको कति भो कति
गहिरो घाउ कसै गरी पुरिँदैन ।

४.
सन्चै छ त भने सन्चो छैन
यतै छ त भन यतै छैन
ढाट्नै पर्ने पार्यो देश दुनियाँले
पदमा पुगेपछि लवज ठिक छैन ।

५.
मेची र कालीको गीत गायो
गीत गाएरै उसले भात खायो
पुर्‍याइयो सत्तामा पनि उसलाई
ऊ त पुग्यो जनताले जिल खायाे ।

०००
इच्छाकामना -३, चितवन ।