नेपाली हास्यव्यङ्ग्य अनलाइन पत्रिका

अमर सन्तति :

१.
राजनीतिक गुठियारलाई आएको छ गणतन्त्र
पराइका ती मतियारलाई आएकोछ गणतन्त्र
गरिब दुःखी जनताको सपनालाई हलाल गरी
यो देशमा अंशियारलाई आएको छ गणतन्त्र ।

२.
खोक्रो आडम्बर अझै भिरी बस्छौ कति ?
चोर मुसाझैँ दुलादुला छिरी बस्छौ कति ?
छोड अब काला कर्तूत, गर असल कर्म
लाज पचाई आफ्नै आमा पिरी बस्छौ कति ?

३.
काशी जाने भन्दै गर्छन् कुतीतिर यात्रा
हिजोभन्दा आज झनै बढ्दो हास्य मात्रा
राजनीतिका कलाकारको कस्तो अभिनय !
गाईजात्रालाई माथ गर्ने देखाउछन् जात्रा ।

०००
रामेछाप ,
हाल भक्तपुर ।