पाँच ठोक्तक
कसले मस्तिष्कमा हिंसा भर्यो हिसाब हुनु पर्छ उपचारका नाममा विषादी छर्यो हिसाब हुनु पर्छ कसले रोप्यो विषवृक्ष राजनीतिमा कसले हुर्कायो गुण्डाराज कसले संस्थागत गर्यो हिसाब हुनु पर्छ ।
रुद्र ज्ञवाली :
१.
हिउँदको लक्षण भन्नु जाडो सर्दी न हो
मान्छेभन्दा बढी शक्तिशाली बर्दी न हो
निर्दोष हिरासतमा अपराधी उन्मुक्तिमा
गुण्डाराजमा हुने यस्तै गुण्डागर्दी न हो ।
२.
राजधानी मोफसल मनबाट यो भ्रम हटाई दिनु पर्छ
देशको पहरेदारी कसले गरिरहेछ त्यो बताई दिनुपर्छ
चार भन्ज्याङ्भित्र बसेर स्याल हुइँया कराइरहेछन् जो
उनलाई देशको नक्सा र एकथान चस्मा पठाई दिनु पर्छ ।
३.
हेपाहाको कमजोर माथिको हार्दिकता कस्तो रहेछ
देखाइने दृश्य कस्तो रहेछ वास्तविकता कस्तो रहेछ
हुँडार बस्तीमा पस्दा पनि गोठाला चुईंक्क बोल्दैनन्
देखियो हाम्रो स्वतन्त्रता सार्वभौमिकता कस्तो रहेछ ।
४.
कसले मस्तिष्कमा हिंसा भर्यो हिसाब हुनु पर्छ
उपचारका नाममा विषादी छर्यो हिसाब हुनु पर्छ
कसले रोप्यो विषवृक्ष राजनीतिमा कसले हुर्कायो
गुण्डाराज कसले संस्थागत गर्यो हिसाब हुनु पर्छ ।
५.
अन्तर्य जे नै होस् तताए उम्लिने गाजहरू रहेछन्
जुनसुकै आवरणमा सत्तामा पुग्ने बाजहरू रहेछन्
ढल्दैछन् अगणित भारतीहरू न्याय खोज्दाखोज्दै
सत्ताका नजरमा पूजनीय उनै योगराजहरू रहेछन् ।
०००
भैरहवा ।