नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
न योे लिखितम्मा न कसैको बचनमा चल्छ
हुदैन अधिनस्थ आफ्नै रीत र चलनमा चल्छ
बन्नु बिग्रनुमा न दोष तिम्रो न दोष मेरो हो
समयको सुई न तिम्रो न मेरो खटनमा चल्छ ।

२.
नौनाडी बसेपछि वनको बाघ चे पनि हुनसक्छ
हिसाब बिग्रेर ले दे अथवा दे ले पनि हुनसक्छ
गर्दै नगर्नुस् नदेखाउनुस् घमण्ड रूप यौवनको
समयको खेल हो जिन्दगीमा जे पनि हुन सक्छ ।

३.
जागिरे मानसिकता कतै पनि उत्तरदायी हुँदैनन्
इन्साफ प्रकृतिका कहिल्यै पनि अन्यायी हुँदैनन्
मान्छेले बनाएका हुन् देव दानव जातजाति सबै
कृत्रिम वस्तुहरू आवधिक हुन्छन् स्थायी हुँदैनन् ।

४.
कहिले घामजस्तै हुनुपर्छ र कहिले पानी हुनुपर्छ
आवश्यक छैन यो सबैको आँखाको नानी हुनुपर्छ
सुन्दैछु उसलाई नरुचाउनेहरू धेरै छन् समाजमा
पक्कै पनि मान्छे इमान्दार र स्वाभिमानी हुनुपर्छ

०००
भैरहवा