नेपाली हास्यव्यङ्ग्य अनलाइन पत्रिका

इ. कुमार खड्का :

वर्षाको उर्लदो खहरे, हिउँदे खोल्सी हुँदो रहेछ
सत्ता, कुर्सी पाएपछि झाँक्रीनै बोक्सी हुँदो रहेछ
प्रकृतिको नियमनै हो, सापेक्ष हुन्छ समय पनि,
नामर्दका गुरुनै पनि मर्दको मुन्सी हुँदो रहेछ ।१

खुट्किला, हाँगा छुट्दा टेक्न समाउनै गाह्रो हुन्छ
बहरको हल नारेर जसरी दाउनै गाह्रो हुन्छ
कठिन हुन्छ, चपाउन नक्कली दाँत फेरे पछि,
स्थायी विश्वास टुट्योभने फिर्ता पाउनै गाह्रो हुन्छ ।२

जो सफाईको कुरागर्छ, उहि कचेरा बनाउँछ
फयलताको कुरा गर्दै सङ्किर्ण घेरा बनाउँछ
हजुर ! अचेल जमाना नराम्ररी बदली भै सक्यो,
सर्प भएर डस्नेले आफैंलाई सपेरा बनाउँछ ।३

अलिखित संविधानले शान्ति, विकास चलेका छन्
धारा, दफाका अक्षरस: घोक्नेकै देश जलेका छन्
अगुवाहरु विवेकहीन भएपछि के गर्नु र खै ?
इतिहासको विरासत अराजकताले गलेका छन् ।४

०००
आलापोट, काठमाण्डौं ।
२०८२/०९/०६