नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
पतीतहरूका योजना पनि बेअदब हुन्छन्
प्रदूषितहरूका रचना पनि बेअदब हुन्छन्
सन्काहा हो जान्दा जान्दै किन जिस्क्याउनु
सन्काहाहरूका सपना पनि बेअदब हुन्छन् ।

२.
उपभोक्ताहरू ब्राण्ड बदल्छन् दुकान बदल्छन्
पुजासामग्री, पुजारी, मन्दिर र भगवान बदल्छन्
यति अस्थिर हुँदोरहेछ स्वार्थ र लोभको तन्तु कि
जडाउरी बदले सरह मान्छेहरूले इमान बदल्छन् ।

३.
भगवान भन्नेको देख्ने आँखा र सुन्ने कान हुँदैन
पिपलपातेको फाइदा बाहेक कुनै अडान हुँदैन
मानिस बहुलाएझैं समय पनि बहुलाएको बेला
तथ्य प्रमाण नजीर या तर्कहरूको स्थान हुँदैन ।

४.
सबै माछा माझीको जालमा फस्छन् जरुरी छैन
सन्त महन्तहरू सबैले खरानी घस्छन् जरुरी छैन
फर्किएनन भनेर किन छट्पटाउँछस् ए बुढो वृक्ष
चराचुरुङ्गी सधै एउटै डालीमा बस्छन् जरुरी छैन ।

०००
भैरहवा