नेपाली हास्यव्यङ्ग्य अनलाइन पत्रिका

काठमाडौं, २०८० भदौ १६ । अनुपम सिर्जना प्रतिष्ठान नेपाल कलङ्कीको १२७ औँ नियमित प्रविधिमैत्री शृङ्खला राष्ट्रिय विभूति युवा कवि मोतीराम भट्टको १५८ औँ जयन्ती विशेष कविगोष्ठी सम्मपन्न भएको छ ।

संस्थाका अध्यक्ष भुवनहरि सिग्देलको अध्यक्षता तथा प्रमुख आमन्त्रित वरिष्ठ कवि डा. बमबहादुर थापा जितालीको उपस्थितिमा भव्यरूपमा सम्पन्न भएको हो ।

उपत्याकाको पश्चिम भेकमा रहेको साहित्यिक संस्थाको कविगोष्ठीमा छन्द, स्वच्छन्द कविता, गीत, गजल, रागविराग, लोकछन्द कविता रोचक ढङ्गबाट कविहरूले वाचन गरिएका थिए । देशभक्ति भावले भरिएका, जनचेतना मूलक तथा समाजिक विकृतिबिरुद्ध प्रहार गरिएका रचना भए । कार्यक्रममा युवाकवि मोतीराम भट्टका सिर्जना पनि वाचन गरिए ।

सो अवसरमा रचना वाचन गर्ने कविहरू भुवनहरि सिग्देल, डा. बमबहादुर थापा जिताली, पुरुषोत्तम सिग्देल, हरि खनाल, गङ्गा लिगल, खोलाघरे साहिँलो, दुष्यन्त भट्टराई, जगदीश्वर पोखरेल, सूर्यकुमार पण्डित, टेकबहादुर लौडारी, उत्तम भेटुवाल र गोमविक्रम थापा हुनु हुन्थ्यो ।

प्रमुख आमन्त्रित जितालीले अनुपम सिर्जना प्रतिष्ठानले भाषा साहित्यको सेवा गर्दै आएको छ । सर्जकहरूलाई आफ्ना रचना वाचन गर्ने अवसर प्रदान गरेको छ । छन्दको संरक्षण गरेको छ भन्नु भयो । कविगोष्ठीमा आफ्नो रचना वाचन गरेर भाग्न हुँदैन । अनावश्यक कुरा गरेर समय नष्ट गर्न हुँदैन । समयको महत्त्व बुझ्न सक्नु पर्दछ भन्नु भयो । युवाकवि मोतीरामले साहित्यमा गर्नु भएको योगदानको चर्चा गर्नु भयो ।

समीक्षक वरिष्ठकवि पुरुषोत्तम सिग्देलज्यूले सिर्जनामा भएका गुण र दोष केलाएर समीक्षा गर्नु भएको थियो । अध्यक्ष भुवनहरि सिग्देलले कवितामा बिम्ब प्रतीकका साथै ध्वनि हुनुपर्छ भन्नु भयो । कविगोष्ठी सफल बनाइ दिनु भएकोमा सबै सर्जकलाई धन्यवाद दिनु हुँदै गोष्ठी समापन गर्नु भएको थियो । उपाध्यक्ष जगदीश्वर पोखरेललेले कुशलतापूर्वक गोष्ठीको संयोजन गर्नु भएको थियो ।

०००