नेपाली हास्यव्यङ्ग्य अनलाइन पत्रिका

कल्पना अधिकारी :

उमेर मात्रै सबथोक हैन
साठी कटेता पनि वृद्ध छैन
जस्तोसुकै काम म सक्छु गर्न
युवाहरूमा नव जोश भर्न ।१।

जाने बुझेको सहयोग गर्ने
छ चाख मेरो उपकार गर्ने
भोगेँ बिताएँ यतिका उमेर
जवान भन्दा कम छैन हेर ।२।

उठी बिहानै निज काम गर्छु
ताजा छ के खै अखबार हेर्छु
छोरा र छोरी पनि छक्क पर्छन्
र जोशको ती गुणगान गर्छन् ।३।

छन् रोग नौला तर सक्छु भिड्न
आत्तिन्न कैल्यै पनि सक्छु हिँड्न
छन् ओखती साथ दिने तमाम
म फाल्छु ती रोग सबै हराम ।४।

व्यायाम हो रोग निदान गर्ने
यो देहमा तागत शक्ति भर्ने
बुझेर यो गर्छु सदा म योग
हट्छन् सबै दुच्छर दुष्ट रोग ।५।

दुर्भावको आश्रय दिन्न दिन्न
चिन्ता चिता हो अब लिन्न लिन्न
संसार मिथ्या छ भनेर बुझ्छु
खुराक ताजा म त खान्छु सुत्छु ।६।

छन् चाहना हिम्मत जोश उस्तै
सफा बनी हिँड्छु सधैँ दुरुस्तै
मैले सकेको सब काम गर्छु
संज्ञानले देश मुहार फेर्छु ।७।

०००