नेपाली हास्यव्यङ्ग्य अनलाइन पत्रिका

कविराज घिमिरे :

बनी सुकर्मी, इमान साँचो, खनेर माटो, उमार्न बीज
बुबा सँगै छन्, सपार्नलाई, हुँदैन गाह्रो, बने सजीव
बसेर आफू, स्वदेश भित्रै, चिनेर आ मा, यहीँ रमाऔँ
नबिर्स हाम्रो, परम्परा यो, बुबा र आमा, सधैँ हँसाऔँ ।। १

पवित्र आत्मा बनेर हाम्रो दियो बलेझैँ छ कर्म साँचो
बनाउने ती सुबुद्धिकर्ता महान् गनिन्छन् नहाल भाँजो
सुदूर बाजे बजै गए ती संस्कार छोडी स्वयम् चलाऔँ
नबिर्स हाम्रो परम्परा यो बुबा र आमा सधैँ हँसाऔँ ।। २

सपार्नलाई गरे अनेकौँ क्रिया यिनैले खपेर दुःख
छ आज हाम्रो भला जगत् यो र भोग गर्छौँ मिलेर सुक्ख
विशाल छाती बनाउँदै यो जबाफदेही बुझेर आऔँ
नबिर्स हाम्रो परम्परा यो बुबा र आमा सधैँ हँसाऔँ ।। ३

भएर रोगी नहुन् अँध्यारा इलाज गर्दै निको बनाई
प्रसन्न पारौँ मिलेर हामी मुसुक्क हाँसौँ बनी दबाई
अहा ! बनोस् यो निवास हाम्रो बुढाबुढी यी खुसी बनाऔँ
नबिर्स हाम्रो परम्परा यो बुबा र आमा सधैँ हँसाऔँ ।। ४

कतै नसामा हुने समस्या कतै दिमागी दशा हुनाले
छँदा बुढ्यौली अनेक बाधा छ भोग्नुपर्ने सबै जनाले
तसर्थ लागौँ बनेर सेवी परोपकारी खुदै जनाऔँ
नबिर्स हाम्रो परम्परा यो बुबा र आमा सधैँ हँसाऔँ ।। ५

हिमालजस्तै बुबा मुमा हुन् पहाड बेँसी सुरम्य फाँट
सदैव हिँड्छन् हरेर बाधा समस्तलाई दिएर आँट
बुझेर यस्ता अपूर्व जोडी लडे कतै यी छिटो उठाऔँ
नबिर्स हाम्रो परम्परा यो बुबा र आमा सधैँ हँसाऔँ ।। ६

०००
भक्तपुर बुढ्यौली सा.समाजमा अभ्यास