नेपाली हास्यव्यङ्ग्य अनलाइन पत्रिका

दीनानाथ पोख्रेल :

बाबुआमा समाएर, काव्य बाटो हिँडाउँछु ।
अकृत्य चेतका पोली, सौम्य सार फिँजाउँछु ।।०१।।

मान्छेको मन दौडन्छ, कर्तव्य खुद त्याग्दछ ।
लिए बुद्धि समाएर, कृत्यको भाव जाग्दछ ‌‌।।०२।।

मान्छे आफैँ उँचो गन्छ, ज्ञानपुञ्ज नकार्दछ ।
यही बाटो चुने उल्टो, आफैँलाई पछार्दछ।।०३।।

मनको चञ्चले चाल, ज्ञानबुद्धि भगाउँछ ।
मन सन्त्रासमा डुब्छ, कृत्यमा त्रास छाउँछ।।०४।।

वृद्ध हुन् कर्मका मन्त्र, प्राप्तिका मूल सुन्दर ।
सोधीखोजी जपे मन्त्र, समुन्नत बन्यो घर ।।०५।।

मान्छे ज्ञानविहीन बन्दछ भने को भन्छ मान्छे भनी ?
छान्दै ज्ञान सुमार्ग हिँड्दछ भने सम्मान गर्छन् गनी।।
सच्चा मार्ग चुनी बढ्यो अगि भने बन्नेछ तारा छुने ।
पाका ईश्वर रम्दछन् अवनिमा मान्छे विवेकी बने ।।०६।।

अग्ला छन् हितकर्म सुन्दर जहीँ को सक्छ व्याख्या गरी ?
छन् विज्ञान दसी गरे मनन ता जो दिव्य आभा सरि ।।
हाम्रै लागि सधैँ समर्पित भए यो बुझ्न जान्यो भने ।
पाका ईश्वर रम्दछन् अवनिमा मान्छे विवेकी बने ।।०७।।

०००
इलाम नगरपालिका वडा नं ०२, इलाम