नेपाली हास्यव्यङ्ग्य अनलाइन पत्रिका

लक्ष्मण नेवटिया

१.
देशी होस् कि विदेशी होस्,साल पक्कै फेरिन्छ,
विगतका भूलहरू सुधार्न हिजोका ऐना हेरिन्छ।
त्रुटि फेरि नदोहोरियोस् समीक्षा सटीक गर्नैपर्छ,
नयाँ सोच र नयाँ दिशाले भावी जीवन खारिन्छ।

२.
सोच उही रहेसम्म के नै हुने हो साल बदलेर,
बाटो उही रहेसम्म के नै हुने हो चाल बदलेर।
विक्रम बयासी आयो, ईस्वीले छब्बीस ल्यायो,
ल्याउनुछ खुशियाली, बेथिति-विकृति बदलेर।

३.
पात्रो फेरिदैमा मात्र कहिल्यै जीवन फेरिँदैन,
आत्मसमीक्षा नगरे सम्म सही बाटो भेटिदैन।
आफूमाथि आफैले राख्नुपर्छ कडा निगरानी,
झूटा कपटी कर्मले जीवनको दिशा बदल्दैन।

४.
आफ्ना भूलहरू लुकाएर कहिल्यै भविष्य बन्दैन् ,
भएका त्रुटी गहिराइले नसुधारेसम्म बाटो सुध्रँदैन्।
भूल जस्तो भए पनि स्वीकार्नु, हार होइन-जीत हो,
आत्म समीक्षा नगरे,साल फेरिन्छ परिवर्तन हुँदैन्।

५.
हिजो आए जस्तो लाग्छ, पुरानो भै हाल्छ नयाँ साल,
न कुनै उत्तर न सवाल यो सबै यस कालको कमाल।
समय हो समय-असमय, विभिन्न स्वरूप देखाउँछ नै,
राख्छ शान्ति उसैले नै, काट्न सक्छ कालको जाल।

०००
विराटनगर