नेपाली हास्यव्यङ्ग्य अनलाइन पत्रिका

जगदीश्वर पाेखरेल :

समयमा सिकिएन कला सखी ।
सलल बग्दछ मानव जिन्दगी ।।
न गरियो तप साधन बुद्धको ।
विगतकै छ सिको अझ वृद्धको ।।१

छ खटिरो हरमा उपचार भो’ ।
रहर भो’ हरमा परिधानको ।।
समय हो मयको घर युद्धको ।
विगतकै छ सिको अझ वृद्धको ।।२

सकल कर्मठ जीवन जोतियो ।
छ परिवार भनी अति घोटियो ।।
छल दबाब छ केवल दुष्टको ।
विगतकै छ सिको अझ वृद्धको ।।३

सुजनको मनमा किन लात भो’ ।
असकको तनमा छल घात भो’ ।।
सबलको बलको शुभ बुद्धि हो ।
विगतकै छ सिको अझ वृद्धको ।।४

सिक नवीन कला परिवारको ।
बन मनुष्य भला उपहार हो ।।
कुशल कल्पनमा डुब सिद्ध हो ।
विगतकै छ सिको अझ वृद्धको ।।५

०००
लमजुङ