नेपाली हास्यव्यङ्ग्य अनलाइन पत्रिका

घनश्याम रेग्मी :

हार्दिक स्वागत !
हाम्रो पसलमा तपाईंलाई हार्दिक स्वागत छ । आउनुहोस् ।
यो हाम्रो पसलमा तपाईंलाई चाहिने सब थोक पाइन्छ । यहाँहरू आफ्नो आवश्यकताअनुसारको सेवा तथा वस्तु खरिद गर्न पाल्नुहोला । यहाँ के पाइन्न र ? हेर्नोस् हाम्रो सस्तो पसल हो । यहाँ हरेकलाई काम लाग्ने वस्तुहरू पाइन्छन् । हाम्रो यहाँ सानादेखि ठुलासम्म लाई चाहिने चकलेट, चोकोफन, चिजबल, चुइगम, चाउचाउ, चाउमिन, चटपटे, चुरोट, च्याप्ने (सुर्ती) आदि ‘च’बाट नाम आउने सबै चिज पाइन्छ स्थानीय चिउराबाहेक । कहाँ ‘च’लाई छोडेर ‘छ’बाट आउने छुर्पी, छोलासमोसा खोज्दै हिँड्नुभएको भन्या ? अस्ति एकजना वरिष्ठ त यस्ता गरिष्ठ कुरा छोडेर केजाते गुदपाक कि पुष्टकारी के खोज्दै हुनुहुन्थ्यो । आजको यो उत्तरआधुनिक जमानामा पनि उहिलेका खुइले कुरा खोजेर हुन्छ त ? त्यो पनि देशको राजधानी शहरको मुटुमा रहेको यस्तो व्यस्त बसपार्कमा रहेको पसलमा ?

आउनोस् हाम्रो पसलको थप चर्चा गरौँ । हाम्रो पसलमा तपाईंलाई चाहिँने सबथोक पाइन्छ । हेर्नुस् त र्‍याकभरि के के छन् ? यहाँ सबै प्रकारका ‘र’बाट नाम आउने स्वदेशी र विदेशी, सस्तादेखि लिएर महँगा, लोकलदेखि लिएर फरेन कन्ट्रीका ‘र’ बाट नाम आउने वस्तु पाइन्छन् रामबाहेक । अझ यहाँ डिप फ्रिजमा हेर्नुस् ‘ब’बाट नाम आउने धेरै चिज पाइन्छन्, तपाईंलाई के नामको र कति प्रतिशत भएको चाहियो ? बोतलमा, क्यानमा, भ्यानमा केमा चाहियो ? भन्नुहोला है । त्यसबाहेक बर्गर, बफ मोमो लगायत अरू धेरै सामान पाइन्छन् केवल बफादारीताबाहेक ।

हाम्रो पसलमा एकछिन बस्नु होस् यहाँ हरेक किसिमका मान्छे आउँछन् । हरेक किसिमका मान्छेहरूबाट किसिम किसिमका गफगाफ सुन्न पाइनेछ । एक छिन पछि यहाँ ठूलो पार्टीका नेता आउँदै हुनुहुन्छ । उहाँ भाषण गर्नका लागि खप्पिस हुनुहुन्छ । उहाँका घन्टौ सुनिरहन मजा लाग्ने भाषण यहीँबाट सुन्न पाइनेछ । देश बनाउने, नागरिकता बनाउने, सरकार बनाउने, छिमेकीसँग सम्बन्ध बनाउने र अरु पनि । वहाँले अलि आफ्नो छवि बनाउने कुरा भन्न छुटाउनु भयो भने पनि दिक्क नमान्नु होला । यहाँ आसनका कुरा पाइन्छन् । अडेस लाग्ने आसन, निदाउने आसन, उँघ्ने आसन, अरुका खुट्टा तान्ने सबै आसनमध्ये तपाईंलाई जुन उपयुक्त हुन्छ लिएर भरपूर मजा लिन सक्नु हुनेछ । नपाइने भनेको जनताको रहने बस्ने आसन (घरबास) मात्र हो ।

हाम्रो पसलमा सिक्न र सुन्न पाइने सेवामध्य अर्को कुरा शासन हो । शासनमध्ये पनि सुशासन सबभन्दा बढी चलेको हुनाले हाम्रा आधिकारिक प्रस्तोताका मुखारविन्दबाट सित्तैमा सुन्न र सिक्न पाउनु हुनेछ । केन्द्रदेखि प्रदेश र स्थानीय तहका सबै तह र तप्काका सुशासनका कुरा नमूना र फेहरिस्त यहाँबाट उपलब्ध गराउन सकिने कुरा तपाईंलाई सहर्ष जानकारी गराउन चाहन्छु । तपाईंलाई के के चाहिन्छ सब पाइन्छ नपाइने त्यही एउटा रासनमात्र त हो । रासन नपाए पनि के भयो त रासनमा लाग्ने घुन पाइन्छ । त्यो रासन त उता छिमेकी देशबाट मगाए भइहाल्यो नि । रासन त मुखमा हाल्यो कि पच्न थाल्छ अनि के काम ? सुन भए जस्तो निल्यो उस्तै उकेल्यो हेर्नोस् त ! विदेशबाट आउनेदेखि लिएर कर्मचारी, व्यापारी, ठेकेदारी गर्नेदेखि मनपरि गर्नेहरू, नेता, जेता, विजेता, उपनेता, मन्त्री, सन्त्री, तन्त्री सबलाई काम लाग्ने । यस्तो सर्वाधिक महत्त्वको वस्तु सुन तपाईंलाई जति भन्यो त्यति परिमाण र गुणस्तरमा व्यवस्था गर्ने खुबी छ हामीसँग ।

हामीसँग टेप, सुपरग्लु कैँची, फिता, फोटोकपी मेसिन, स्टिचिङ मसिन तथा बाइन्डिङका सेवा सुविधा नगदमा किन्न वा किस्ताबन्दीमा पनि उपलब्ध हुनुका साथै सट्टापट्टामा र भाडामा पनि पाइने कुरा यहाँ अवगत गराउन चाहन्छु ।

उपर्युक्त वस्तु तथा सेवाको होम डेलिभरी सर्भिस पनि यहाँ पाइने कुरा यहाँलाई जानकारी गराइन्छ । वारिदेखि पारिका कुरा, घारीदेखि दारी र यारीका कुरासमेतमा प्रमाणपत्र, परिचयपत्र बनाउने र ठेक्कापट्टाको कागजात भर्ने, मिलाउने सिलाउने र तत्सम्बन्धि सम्पूणर् काम गरिने हुँदा यहाँ पाल्नुहुन अनुरोध गर्दै आफ्ना दुई शब्द यहीँ टुङ्ग्याउन चाहन्छु ।

मेरा दुई शब्द सुनिदिनु भएकोमा आभारी छु । हवस् त धन्यवाद !

विनीत: व्यस्त पसले, गोङ्गबु बसपार्क, काठमाडौं

०००
हालः बैजनाथ -१, चिसापानी, बाँके