नेपाली हास्यव्यङ्ग्य अनलाइन पत्रिका

बासुदेव तिमल्सिना :

“आज मैले घरमा खाना बनाएको छैन । आज रातको खाना बाहिरै खाने ।”
पति अफिसबाट साँझमा घर पुग्ने बित्तिकै पत्नीले रिसाउँदै भनी ।
“ठिकै छ त, कुनै होटलमा गएर खाउँला ।” पति विवश थियो ।
“कुनै होटल होइन । पाँचतारे होटलमा खाने हो ।”

पति पत्नी पाँचतारे होटलतिर हिडे । बाटामा पतिको मनमा खुल्दुली चल्न थाल्यो । बिल कति उठ्ने हो । उसँग भएको पैसाले पुग्ने हो कि नपुग्ने हो । जाँदै गर्दा पत्नीले एउटा घटना सुनाई । केही बर्ष अघि उसकी पत्नी र उसकी सालीको बीचमा पानीपुरी कसले बढी खाने भन्ने बाजी पर्यो रे । बाजी उसकी पत्नीले जिती रे ।
यति सुनेपछि पतिले भन्यो, “पानीपुरी खान तिमीले मलाई जित्न सक्दिनौ ।”

यो सुनेर पत्नीको अहमता बढ्यो । उसले पतिलाई च्यालेन्ज गरी । दुबैजना पानीपुरी बेच्ने ठेलावालाकोमा पुगे । पानीपुरीको अर्डर भयो । कपाकप खान थाले दुबै पति पत्नी । पतिले बीस वटा पानीपुरी खाएपछि अघायो र खान छाड्यो तर पत्नीले भने अरु पाँच वटा कनीकनी खाई । पतिलाई जितेकोमा उ खुसीले हास्न थाली । दुवैजना अघाए । जम्मा दुईसय रुपैयाँमै बेलुकाको भोजन टर्‍यो ।

घर फर्किँदा पति ठूलो खर्च जोगिएकोमा खुसी थियो भने पत्नी बाजी जितेकोमा ।
यस्तैमा पतिले पत्नीलाई सोध्यो, “प्रिय ! कस्तो थियो त पाँचतारे होटलको आजको खाना ?”

०००
लालबन्दी, सर्लाही