नेपाली हास्यव्यङ्ग्य अनलाइन पत्रिका

घुम्न आऊ !
नेपाल महान देश छ,
हरियो वन छ, कोमल मन छ ।
चाँदीको शिखर छ,
सितल सांग्रिलाको पर्यटन छ ।
सुनको बाला झुल्ने तराई मधेश छ ।
खानी छ, पानी छ,
गुराँसको जवानी छ ।
संसार उचाल्ने गोरखाली जिन्दगानी छ ।
इन्द्रेनीमय प्रकृति छ,
विविधतामय संस्कृति छ ।
आउँदा जाँदा एउटा कुराबाट जोगिए पुग्छ,
एक अन्जुली विकृति छ,
एक पसर स्वार्थी प्रवृत्ति छ ।

मात्र दलाल भेट्न सक्नुपर्छ,
यहाँ नदी विक्रिमा छ,
हिमाल विक्रिमा छ ।
नमक हलाल भेट्न सक्नुपर्छ ।
युवा विक्रिमा छन्,
युवती विक्रीमा छन् ।
अनिकाल भेट्न सक्नुपर्छ ।
भोट किन्न पाइन्छ,
घोषणापत्रका अठोट किन्न पाइन्छ ।
न्यायाधीश र वकिल बिक्रिमा छन्,
दोकानका भ्याटबिल बिक्रिमा छन् ।
ठेकेदारको सन्जाल भेट्न सक्नुपर्छ,
यहाँ, पद किन्न पाइन्छ,
सांसद किन्न पाइन्छ ।
मन्दिरका देउता किन्न पाइन्छ ।
ठूलो दलाल भेट्न सक्ने हो भने,
देश नै किस्तीमा राखेर,
किस्तामा किन्न पाइन्छ ।

दलाल भेट्न गाहारो छैन,
चिल्लो गाडी रोके पनि देखिन्छ ।
रातो दरबार पसे पनि देखिन्छ,
सेतो दरबार पसे पनि देखिन्छ ।
गाउँमा जाँदा,
मञ्चबाट उफ्री उफ्री
देशभक्तिको कुरा गर्नेलाई पछ्याए नि हुन्छ,
सत्ता र शक्तिको कुरा गर्नेलाई समाए नि हुन्छ ।
पार्टी फुटाउनेले पनि
आमसभा जुटाउनेले पनि,
किनबेचमा सघाउन सक्छ,
नसके डिलरबाट फोन गरेर मगाउन सक्छ ।
यहाँ अरबौं डलरले किन्न नपाउने
मात्र दुइटा चिज छः
एउटा यहाँको स्वार्थी प्रवृत्ति हो,
अर्को समाजमा हुर्केको विकृति मात्र हो ।
अरु सब बिक्रिमा छ,
देश सोकेसमा सजाएको सामान भएको छ,
दलाल स्वयम् सिक्रीमा छ,
मात्र जनता, जनतामात्र चिन्ता र फिक्रीमा छ ।

संखुवासभा