नेपाली हास्यव्यङ्ग्य अनलाइन पत्रिका

हिजो चोरहरू स्कुल गएछन्
डेक्स बेन्चका काँटी उखेलेछन्
ढोकाको कब्जा निकालेछन्
चुकुल च्वाईच्वाई पारेछन्
केही नलागेर ताला काटेछन्
हिजो चोरहरू स्कुल गएछन् ।

कुर्सी भाँचेछन्, कालोपाटी फुटाएछन्
चकलाई पानीमा घोलेर जथाभावी पोखेछन्
चोरहरूले चुकुल, काँटी र कब्जा बेचेर
गोलखाडी खेल्न तास किनेछन्
चोरलाई अचेल स्कुल प्यारो लाग्छ ।

शिक्षित चोर बन्नका लागि उनीहरू
विद्यालयमा भर्ना भएका छन्
चोरहरू किताबको कमिसनमा छन्
ड्रेसमा छन् जुत्ता र मोजामा छन्
चोरहरू शिक्षित भएर स्कुलमा छन् ।

देश चलाउने दाउमा उनीहरू
दरबार छिर्छन्, तरबार झिक्छन्
भय र त्रासमा दुनियाँलाई पारेर
चोरहरू तरमार्ने दाउमा छन्
चोरहरू स्कुल गएपछि
पदोन्नति भएका छन् ।