नेपाली हास्यव्यङ्ग्य अनलाइन पत्रिका

जाँगर कामको हराई, फुट्यो मूल बातको
विर्सँे तुच्छ इमान सबै, घमण्ड भो जातको ।
पसिना बग्ने शरीरमा, देशकै विकास बगाएँ
फालेर कुटो-कोदालो, साँच्चै म ठूलो भएँ ॥

बेकामको काम गर्दिन म त, कुरा ठूला गर्दछु
घरमै भकारी छ नेता खेतीको, सर्वोच्चमै पर्दछु ।
संघर्षमै बित्छ दिनरात, व्यथा गुट-उपगुटको
मल्केको छ खेती हलक्कै, दुई नम्बरी झूटको ॥

आफू र आफ्नाहरूलाई सधैँ, जहाँतहीँ भलो गर्दछु
लुटेर आस्थाको भकारी सबैको, भूँडी आफ्नै भर्दछु ।
बोलेको काम गर्छु भनी कसम, नेपाल आमाकै खाएँ
बुझ्नु भो नि आज म सबैको, ठूलो यसरी भएँ ॥

जादू छ मेरो बोलीमा, सबैलाई मख्ख पार्दछु
बोल्छु मिठो यति धेरै, हसाइँ-हसाइँ मार्दछु ।
दल, पार्टी, सिद्धान्त सबैको, साझा म हुँदै गएँ
लागेन बेर अबेरमै, साँच्चै ठूलो यसरी भएँ ॥

मेरै छ दुनियाँ नेपाल भरि नै, मेरै कुरा गर्दछन्
माया गर्छन् मिडियाले, फूलपाती मैलाई छर्दछन् ।
कर्म नगरी फलहरू सबै, टिप्दै अगाडि गएँ
सुन्नु भो नि कथा मेरो ? ठूलो यसरी भएँ ॥

०००
स्याङ्जा, हाल- काठमाडौं