पदवी र विभूषण नदेऊ सरकार
न त हामी नातेदार हौँ, न तिम्रा क्राइटेरियामा पदकको हकदार नै हौँ । हामीजस्ता वेदाग, देशभक्त, इमान्दार नागरिकलाई, विभूषण दिएर आफ्नो कालो दाग नहटाऊ ।
शम्भु जमरकट्टेल ‘हेदाङ्ने’ :
सरकार !
अति भए मलाई जेल देऊ,
गोडामा नेल लगाऊ ,
हातमा हतकडी ठोक,
करङ्ग भाँचिने गरि कुट ।
भएको जायजेथा सवै लुट,
बरु त्यो सवै सहन्छु !!
तर, कुटेर बेहोस भएको बेलामै भए पनि,
मेरो गलामा मान, पदवी र विभूषण नदेऊ ।
मेरो इज्जतको हुर्मत नलेऊ ।
हामी देशभक्त नागरिक पदका लागि अयोग्य छौँ
कसैको ज्यान मारेका छैनौँ,
कसैेलाई बेपत्ता पारेका छैनौँ,
न ठेक्कापट्टाको कमिसनमा राल झारेका छौँ,
न कालोधनको प्रतिशत
खुरूखुरू नेतातिर सारेका छौँ ।
न त हामी नातेदार हौँ,
न तिम्रा क्राइटेरियामा पदकको हकदार नै हौँ ।
हामीजस्ता वेदाग, देशभक्त, इमान्दार नागरिकलाई,
विभूषण दिएर आफ्नो कालो दाग नहटाऊ ।
मनपरी गर,
नागरिकता बेच,
विवाह गरेर आउने ज्वाइँ र बुहारीलाई,
आएकै दिन नागरिकता देऊ,
उनीहरूसंग कुस्त पैसा लेऊ,
महाकाली बेच, कोशी बेच,
जलविद्युत आयोजना चढाऊ,
विकासको फुर्ति लडाऊ,
बरु, यो देशै वेचेर खाऊ ।
तर, विन्ति छ सरकार !
हामी जस्ता वेदाग देशभक्तलाई विभूषण नदेऊ !
हाम्रो इज्जतको हुर्मत नलेऊ ।
सक्छौ आफ्ना परिवार भित्रै बाँड,
सक्दैनौ आफन्त भन्दा टाडा नबाँड ।
हामीलाई विभूषण दिएर,
नबनाऊ तिम्रो कलङ्कको भागिदार,
हुने मन छैन कुनै पदकको साझेदार !!
०००
काठमाडौं