नेपाली हास्यव्यङ्ग्य अनलाइन पत्रिका

बिन्दु दहाल मूकदर्शक :

जो मार्छ मान्छे सब छोड्न थाल्यौ
उल्टो दिशामा पद चाल्न थाल्यौ
आफैँ जलायौ गरिमा इमान
धोती लगायौ किन संविधान ? १

छन् चोर डाँका हतियार तिम्रा
यो राष्ट्र लुट्ने मतियार तिम्रा
पार्‍यौ बिरामी गणतन्त्र जान
धोती लगायौ किन संविधान ? २

रोएर हिँड्छ्न् सब सर्वहारा
बग्छन् नदी झैँ नित अश्रुधारा
तोडेर सारा विधिका विधान
धोती लगायौ किन संविधान ? ३

आतङ्कारी पनि छोड्न थाल्दा
आफ्ना बिराना मनमा बराल्दा
के पर्छ होला मन भित्र भान ?
धोती लगायौ किन संविधान ? ४

कुर्सी समाई किन पक्षपात ?
गर्छौ तिमीले भन ए कुजात
मान्छेहरू यी सब छन् समान
धोती लगायौ किन संविधान ? ५

०००
दमक, झापा