नेपाली हास्यव्यङ्ग्य अनलाइन पत्रिका

उत्तम विचार :

हुँँ कुर्सी पुजारी सधैंँ पुज्न पाऊँ
म सत्ता र भत्ता दुवैमा रमाऊँ ।
जहाँ हुन्छ कुर्सी त्यहीँ कामधन्दा
मलाई छ प्यारो यही प्राणभन्दा ॥१।

यता हेर्छु हाम्रा उता हेर्छु हाम्रा
कुनै छानिएनन् भनी योग्य राम्रा ।
गुमाएर कुर्सी नभोगूँ म सास्ती
घुमाएर कुर्सी गरूँ मोजमस्ती ॥२।

मिलूँ खान पाए गरूँ एकभक्ति
बनूँ देश हाँक्ने म नै सर्वशक्ति ।
सबै पक्षलाई समेटेर जाऊँ
जपूँ मूल नारा र आफैँ म खाऊँ ॥३।

नदेखेर कुर्सी हिजोअस्ति जस्तो
नहोस् चिन्न गाह्रो म नैँ हैन जस्तो ।
चलोस् राज मेरै विना रोकटोक
ममा प्यास बढ्दो छ कुर्सी भोक ॥४।

सबै भ्रष्ट जाली मिली खान खोज्ने
कहाँँ भाग पुग्थ्यो कुरै छन् नबुझ्ने ।
हिजो स्वप्न देखेँ लगे मेच आई
न निद्रा न ता भोक पारे मलाई ॥५।

सबै त्याग्न सक्ने म कुर्सी नसक्ने
यही मूलमन्त्र कुर्सी म जप्ने ।
फुटाएर पार्टी सबै छिन्नभिन्न
म पारूँ बनूँ अङ्ग आफैँ अभिन्न ॥६।

फुकाएर गाँठो बढूँ भन्न सक्छन्
मिली उच्च माथा चढूँ भन्न सक्छन् ।
यही तीर्थ मेरो यही चार धाम
पुजूँ नित्य कुर्सी जपूँ रामराम ॥७।

०००
काठमाडौं