नेपाली हास्यव्यङ्ग्य अनलाइन पत्रिका

रमेश खकुरेल :

दलालको देश कुनै हुँदैन
दलालको धर्म कुनै हुँदैन
दलालको जात कुनै हुँदैन
दलालको साथ कुनै हुँदैन ।।

दलालका लागि पिता छ पैसा
माता छ पैसा अनि मित्र पैसा
मायाँ छ पैसा अनि धर्म पैसा
हो मर्म पैसा अनि कर्म पैसा ।।

यी बेच्न सक्छन् जननी लगेर
यी ढाँट्न सक्छन् खुद नै ठगेर
यी नाच्न सक्छन् सब नाङ्गिएर
यी हाँस्न सक्छन् बिष झाङ्गिएर ।।

न भो हिजो के त्यसको छ मान
न भोलिका लागि छ राख्‌नु शान
जे होस् त्यहीं खोज्छ दलाल खान
चाहे बनोस् भोज्यथलो मसान ।।

दलाल यस्तो किन जन्मिंदैन
जो लाज मानीकन देखिंदैन
जो बन्नु पर्दा यसरी दलाल
दु:खी बनी मान्छ ठुलो मलाल ।।

०००
कमलपाेखरी, काठमाडाैं