नेपाली हास्यव्यङ्ग्य अनलाइन पत्रिका

लक्ष्मण नेवटिया :

जाडोमा घटना घट्यो शर्मनाक।
नाकको नै कट्ने भयो नाक।
रक्ताम्य भै घाइते भएको देखेर
लेख्नै पर्यो नाकको व्यथा दर्दनाक।

जीउभरी नाकको डाँडोको
आफ्नै थियो धाक।
तर अचेल आँखाको भर्‍याङमुनि
नाकका अँध्यारा दुवै गुफामा
नकच्चरो सिंगानको
चलिरहेको छ मौजमस्ती बेबाक।

जीउले चाहन्छ बाहिर पठाउन सिंगान
मनले तानेर घाँटीमा बसाइदिन्छ ससम्मान,
बाहिर नाकको चिसोसँग घमासान,
भित्र न्यानोमा आनन्द मनाउँछ
एक नम्बरको शैतान यो सिंगान।

साहु महाजन तानेर मस्त,
गरीब फाल्दै अस्तव्यस्त।
नाकको सोत्तर उप्काउँदै, कोट्याउदै
जसले जति जोर लाउँदा पनि
नाकको आसनमा निर्धक्कले विराजमान
अजातशत्रु- बेइमान यो सिंगान
बिचरो नाक- हैरान।

०००
विराटनगर