नेपाली हास्यव्यङ्ग्य अनलाइन पत्रिका

देव भट्टराई :

बाँडेर आश्वासन भर्छु झोला ।
त्यो पूर्ण होला अवथा नहोला ।।
पत्याउँने यी मनु मेषझैँ छन् ।
के जान्छ मेरो ? जनता छँदैछन् ।।०१

छन् फूल खादा मणिहार भर्ने ।
छ को र ? मेरो प्रतिकार गर्ने ।।
बोलेँ भने कानुन बन्छ भाइ ।
भन्दिन्छु गङ्गाजल मूत्रलाई ।।०२

यो देश मेरो छ प्रदेश मेरो ।
पहाड मेरो छ मधेस मेरो ।।
पेवा छ मेरै दल लालझण्डा ।
म माथि हो ठान्दछु देशभन्दा ।।०३

हारोस् सधैँ देश म जीतमा छु ।
ऐसा र पैसा मृदु प्रीतमा छु ।।
कमान मेरो छ सधैँ अगाडि ।
त्यो दीन दु:खी छ मरोस् पछाडि ।।०४

रोऊन् कराऊन् दरकार छैन ।
उनीहरूको सरकार छैन ।।
विदेश जाऊन् रुपियाँ पठाऊन् ।
पार्टी र नेता उपियाँ अघाऊन् ।।०५

खोला र पानी वन ठान्छु मेरै ।
बेचेर माटो धन जोड्छु धेरै ।।
त्यो मान्दिनेले जबसम्म मान्छ ।
छ मोज मेरो अनि के न जान्छ ?०६

०००
भोजपुर, हाल काठमाडौं