नेपाली हास्यव्यङ्ग्य अनलाइन पत्रिका

उत्तमकृष्ण मजगैयाँ :

देशभन्दा पार्टी ठूलो
पार्टी भन्दा नेता ठूलो
भार थाम्ने कसरो हो ?
शिरभन्दा फेटा ठूलो !

शान्तिभन्दा क्रान्ति ठूलो
भोकभन्दा नारा ठूलो
विडम्बना यस्तै यहाँ
चन्द्रभन्दा तारा ठूला !

कामभन्दा बात ठूलो
मान्छेभन्दा जात ठूलो
उज्यालोमा तर्सनेको
दिनभन्दा रात ठूलो !

प्रजातन्त्र तीतो भयो
देवभन्दा जुद्ध ठूलो
मसीभन्दा असी राम्रो
बुद्धभन्दा युद्ध ठूलो ।

नानीभन्दा आची ठूलो
सत्यभन्दा साक्षी ठूलो
गुणभन्दा गान ठूलो
बुद्धिभन्दा मान ठूलो !

बाबुभन्दा छोराे ठूलो
गुरुभन्दा चेलो ठूलो
यो त नयाँ संस्कृति हो
सबैभन्दा म पो ठूलो !

०००
दाङ
जय अवसरवाद (२०५४)