नेपाली हास्यव्यङ्ग्य अनलाइन पत्रिका

डा. खगेन्द्रप्रसाद दाहाल :

सधैँ खाने खान्छन् ढसमस बसी छन् मुसुमुसु
हसुर्नेका वार्ता सहजसित चल्छन् खुसुखुसु
जुठा भाँडा आफैँसित कलहका छन् कति निहुँ
जुठेल्नोका भाँडासँग कचहरी चल्छ दिनहुँ ॥

ठुला साना तारे सुखसयलका होटल मुनि
अँध्याराका धन्दासहित मनका व्यञ्जन चुनी
बसेका मान्छेको कलुषित जुठोको लतपत
जुठेल्नोका भाँडा विरहसित बोल्छन् फतफत ॥

सुराका प्याला छन् चमच बटुका प्लेट कप छन्
बसेका कुर्सीमा गजसरि उठेका उदर छन्
उता भाँडो भान्सासित पर गई गर्छ जिरह
जुठेल्नोको हल्ला कचकच छ चल्दै अझ पर ॥

कुनै भाँडा आगोसित जलिरहन्छन् भरदिन
धुवाँ ध्वाँसो पोती प्रतिदिन खिइन्छन् हरदम
दुखेसाका बाढीबिच म छु सदा सुन्छु म बसी
जुठेल्नोका भाँडाबिच छु अहिले भर्दछु मसी ॥

म भाँडा माझ्नेमा नजर कसको पुग्छ र कहाँ
ठुला खान्छन् जान्छन् मति अगतिला छन् कति यहाँ
मलाई प्यारा छन् हरकिसिमका वर्तन धन
छ को खोजी गर्ने थिति नियमवाला प्रिय मन ॥

०००
झापा